पुणे – सामाजिक एकतेसाठी ‘ संत विचारांची शिदोरी ” घेऊन निघणाऱ्या चोखोबा ते तुकोबा एक वारी समतेचीचे प्रस्थान बुधवारी १ जानेवारीला मंगळवेढा येथून होणार आहे.
संत चोखामेळा अध्यासन केंद्र आणि वृंदावन फाऊंडेशन यांच्या संयुक्त विद्यमाने ‘चोखोबा ते तुकोबा’ या समता वारीचे आयोजन करण्यात आले आहे.
वारीचा प्रारंभ बुधवार, दि. १ जानेवारी २०२५ रोजी श्री संत चोखामेळा महाराजांची कर्मभूमी असलेल्या मंगळवेढा येथे होणार आहे. भागवत धर्म – वारकरी संतांनी सांगितलेल्या समता, मानवता आणि बंधूभाव या मूल्यांचा जागर हा समता वारी आयोजनामागील मुख्य उद्देश आहे.
‘चोखोबा ते तुकोबा – एक वारी समतेची २०२५ ‘चे यंदाचे ७ वे वर्ष आहे. बुधवारी प्रस्थान सोहळ्यानिमित्ताने सकाळी ९ वा. मंगळवेढा येथील श्री दामाजी महाविद्यालय येथे ‘ संत चोखोबांचे विचारधन ‘ या विषयावर सावित्रीबाई फुले पुणे विद्यापीठ मराठी अभ्यास मंडळ अध्यक्ष प्रा. डॉ. संदीप सांगळे व प्रा. सोमनाथ लांडगे संवाद साधणार आहेत.तसेच संत चोखामेळा महाराज समाधी मंदिर येथे संत चोखामेळा अध्यासन केंद्राचे संस्थापक – समता वारीचे निमंत्रक सचिन पाटील यांच्या हस्ते संत चोखोबांच्या चरणी पुष्पहार अर्पण करुन वारी चे प्रस्थान होईल.
ही वारी महाराष्ट्रातील मंगळवेढा, पंढरपूर, अरण, सोलापूर, अक्कलकोट, उमरगा, माकणी, औसा तुळजापूर, धाराशिव, तेर, कसबे तडवळे, येरमाळा, भूम-पाथरुड, खर्डा, जामखेड, सावरगाव घाट, गहिनीनाथगड, पाथर्डी, पैठण, जालना, सिंदखेडराजा , मेहुणाराजा , देउळगांवराजा , संभाजीनगर , नेवासा, शिर्डी, ताहराबाद, नगर, पिंपळेनर, राळेगणसिद्धी, शिरूर, कोरेगाव भिमा, वढू बुद्रुक, वाघोली, पुणे, आळंदी या मार्गे येऊन देहू येथे जाणार आहे. वारी राज्यातील ९ जिल्ह्यातून १७५० किलोमीटर प्रवास करणार आहे.
सर्व संतांनी सांगितलेल्या समता, बंधूता व मानवता या विचारांचे दर्शन घडवणारी चित्रफीत वारी मार्गावर दाखवण्यात येणार आहे. संत चोखोबांची उत्सवमूर्तीही विशेष सजविलेल्या गाडीत विराजमान असणार आहे. शाळा, महाविद्यालय, वाड्या-वस्ती, गाव, शहर या ठिकाणी जाऊन वारी दरम्यान प्रबोधन करण्यात येणार आहे. माणसा माणसातील वाढत चाललेली दरी कमी होऊन समाजात बंधूभाव वाढीस लागावा, समाजातील जातीय-धार्मिक विद्वेषी दरी कमी होऊन आपापसात बंधूभाव वाढावा यासाठी तसेच समता, मानवता व बंधूभावाचा विचार अधिकाधिक नागरिकांपर्यंत पोहचविण्यासाठी समता वारीचे दरवर्षी आयोजन करण्यात येते.
एकसंघ समाज हे राष्ट्रीय एकात्मतेचे मुख्य अधिष्ठान आहे. जात, पंथ, धर्म, प्रांत या पलीकडे जाऊन आपण सर्वजण भारतीय एक आहोत हा विचार घेऊन सामाजिक एकतेसाठी ‘चोखोबा ते तुकोबा एक वारी समतेची’चे आयोजन यावर्षी देखील करण्यात आले आहे. संत चोखामेळा समाधी मंदिर मंगळवेढा येथील प्रस्थान सोहळ्यास सर्व चोखामेळा भक्त मंडळी , वारकरी संत सज्जन , समाजाने मोठया संख्येने चोखोबांना वंदन करण्यास उपस्थित राहावे असे आवाहन चोखोबा ते तुकोबा एक वारी समतेची मध्यवर्ती संयोजन समिती अध्यक्षा प्रा. अलका सपकाळ व कार्यवाह प्रा. डॉ. राजेंद्र थोरात , प्रस्थान सोहळ्याचे संयोजक सतीश दत्तू जयराज शेंबडे यांनी केले आहे.
