नवी दिल्ली : सध्या श्री राम मंदिराच्या अभिषेकाची तयारी जोरात सुरू आहे. या खास प्रसंगी अभिनेते आणि राजकारणी रवी किशन त्यांचा ‘अयोध्या के श्री राम’ म्युझिक व्हिडिओ लॉन्च करण्याच्या तयारीत आहेत. त्यांनी भक्तिगीतासाठी रॅप केला आहे, ज्याचे रेकॉर्डिंग आज राष्ट्रीय राजधानीत झाले. रवी किशन यांच्या म्हणण्यानुसार, भगवान श्री राम मंदिराचे उद्घाटन संपूर्ण जग पाहणार आहे, तसेच 22 जानेवारी रोजी होणारा हा एक भव्य उत्सव असणार आहे.

म्युझिक व्हिडिओवर एएनआयशी बोलताना रवी किशन म्हणाले की, “हे गाणे आमच्याकडून प्रभू रामांना केलेले एक अभिवादन आहे. चाहत्यांना माझा आवाज आवडला आहे आणि मला खात्री आहे की त्यांना हा ट्रॅक आवडेल. शिवाय, ते तरुणाईशी संबंधित आहे. फ्यूजन संगीत आणि अशा भक्तिगीतांमध्ये रॅप मिळणे फारच दुर्मिळ आहे. त्यामुळे लोक त्यावर प्रेमाचा वर्षाव करतील. तसेच माननीय पंतप्रधानांनी देखील हॅशटॅग वापरून प्रत्येकाला त्यांचे कलात्मक योगदान शेअर करण्याचे आवाहन केले आहे ज्यामुळे आम्हाला ते लोकप्रिय करण्यात मदत झाली आहे. काही ट्रॅक अजरामर होतात आणि मला असे वाटते की हा त्यापैकी एक आहे. तो सर्वत्र वाजवला जाईल.”

पुढे रवी किशन म्हणाले की, “आम्ही 500 वर्षांपासून त्याची वाट पाहत होतो. असंख्य संत आणि ऋषींना मारले गेले पण, शेवटी पंतप्रधान मोदी आणि आमच्या पक्षाचे आभार मानतो की हा क्षण आला. ज्याची आपल्यापैकी प्रत्येकजण खूप दिवसांपासून वाट पाहत आहे. हा एक भव्य सोहळा असणार आहे जो संपूर्ण जग पाहणार आहे. याचा भाग होण्यासाठी मी भाग्यवान समजतो.”

भव्य सोहळ्याची जय्यत तयारी सुरू आहे. अयोध्येतील राम मंदिराच्या ‘प्राण प्रतिष्ठे’साठी राजकीय आणि धार्मिक नेत्यांव्यतिरिक्त अमिताभ बच्चन यांच्यासह बॉलिवूड कलाकारांना आमंत्रित करण्यात आले आहे. मात्र, अनेक राजकारण्यांनी त्यांना आमंत्रण मिळाले नसल्याचा दावा केला आहे. त्यावर प्रतिक्रिया देताना रवी किशन म्हणाले की, अलीकडेच मी राम मंदिराच्या मुख्य पुजाऱ्याची मुलाखत ऐकली आणि त्यांनी सांगितले की, प्रभू रामावर श्रद्धा असलेल्यांनाच आमंत्रण पाठवण्यात आले आहे. 

ट्रॅकबद्दल तपशील शेअर करताना, संगीतकार माधव एस राजपूत म्हणाले, “आम्ही गाण्याचे शूटिंग गोरखपूरमध्ये भव्य पद्धतीने केले आहे. जवळपास 500 नर्तक आणि अतिशय नामवंत संगीतकार आहेत जे या म्युझिक व्हिडिओचा भाग आहेत.”

श्री मॅक्स एंटरटेनमेंट या बॅनरखाली या गाण्याची निर्मिती निरंजन कुमार सिन्हा यांनी केली आहे, गीत मीनाक्षी एसआर यांनी लिहिले आहे, तर संगीत रवी किशन आणि माधव एस राजपूत यांनी दिले आहे. गाण्याचे नृत्य दिग्दर्शन रिकी गुप्ताने केले आहे. तसेच या गाण्याचे छायाचित्रकार शकील रेहान खान आहेत.