ठाकरे गटाचे खासदार संजय राऊत हे दररोज माध्यमांशी बोलताना सत्ताधारी पक्षांवर टीका करत असतात. आज त्यांनी भाजपसह विधानसभा अध्यक्ष राहुल नार्वेकर यांच्यावर सडकून टीका केली. तसेच काही दिवसांपूर्वी संजय राऊतांनी उपमुख्यमंत्री देवेंद्र फडणवीस यांचा शूपर्णखा असा उल्लेख करत त्यांच्यावर टीका केली होती. तर आज (17 जानेवारी) देवेंद्र फडणवीसांनी कराडच्या कृषी प्रदर्शनात संजय राऊतांचं नाव न घेता त्यांच्यावर निशाणा साधला.
यावेळी देवेंद्र फडणवीस म्हणाले की, कराडच्या कृषी प्रदर्शनामध्ये 42 लाखांचा बैल आला आहे. तसेच इलेक्ट्रॉनिक बैल आणि सर्वात छोटी गाय देखील आली आहे. अशाप्रकारे या कृषी प्रदर्शनात आपल्याला अनेक वेगवेगळ्या गोष्टी पाहायला मिळत आहेत.
तसेच माझी तुम्हाला एक विनंती आहे की, आमच्या मुंबईत काही रेडे हे मोकाट सुटले आहेत. जर त्या रेड्यांचा बंदोबस्त करण्याची काही योजना असेल तर सांगा. ते रेडे टीव्हीवर इतके बोलतात की त्यावर काही तंत्रज्ञान असेल तर आम्हाला सांगा, असा खोचक टोला देवेंद्र फडणवीसांनी संजय राऊतांना लगावला आहे.
पुढे देवेंद्र फडणवीसांनी शेतीविषयक कामाचे कौतुक केले. जेव्हा कृषी आणि उद्योग हातात हात घालून चालतात तेव्हाच आपला शेतकरी समृद्ध होतो, असे वक्तव्य फडणवीसांनी केले आहे. दरम्यान, कराडमध्ये झालेल्या आजच्या या कृषी प्रदर्शनात देवेंद्र फडणवीसांसोबतच खासदार उदयनराजे भोसले देखील उपस्थित होते.
