अखेर अशोक चव्हाण भाजपमध्ये
पहिलीच बातमी आहे ती म्हणजे राज्याच्या राजकारणाला नवी दिशा देणारी. कारण राज्याचे माजी मुख्यमंत्री, काँग्रेसचे ज्येष्ठ नेते अशोक चव्हाण यांनी आज भाजपात प्रवेश केला आहे. माझा हा निर्णय वयक्तिक असल्याचे त्यांनी स्पष्ट केले. भाजपच्या प्रदेश कार्यालयात राज्यतील भाजपाचे वरिष्ठ नेते आणि उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे, आशिष शेलार आणि इतर दिग्गज नेत्यांच्या उपस्थितीमध्ये अशोक चव्हाण यांचा पक्षप्रवेश पार पडला.
देवेंद्र फडणवीसांचा पटोलेंना टोला
आजच्या पक्षप्रवेशामध्ये अशोक चव्हाण यांनी माझा हा निर्णय वैयक्तिक असल्याचे स्पष्ट केले आहे. तसेच पत्रकारांनी नाना पटोले यांच्याबद्दल फडणवीसांना प्रश्न विचारला असता, फडणवीसांनी नाना पाटोले हे एका ठिकाणी एका पदावर टिकूच शकत नाही असा टोला फडणवीसांनी पाटोलेना लगावला आहे. अशोक चव्हाण यांच्या पक्षप्रवेशावेळी पत्रकार परिषद झाली. यावेळी देवेंद्र फडणवीस बोलत होते. यावेळी त्यांना नाना पटोले यांच्याबाबत प्रश्न विचारण्यात आला. यावेळी ते म्हणाले, ”नाना पटोले यांना देखील आम्ही प्रवेश दिला होता की नाही? आता त्यांची सवय आहे एका ठिकाणी टिकूच शकत नाहीत ते. कोणत्या एका पदावर देखील टिकू शकत नाहीत. त्यामुळे ते सांगतात त्यांना फार गांभीर्याने घेऊ नका.”
अशोक चव्हाणांना राज्यसभा उमेदवारी मिळणार?
अशोक चव्हाण यांनी आज भाजपात प्रवेश केला आहे. कदाचित भाजप अशोक चव्हाण यांना राज्यसभेची उमेदवारी देण्याची दाट शक्यता निर्माण झाली आहे. कारण आधी १५ तारखेला केंद्रीय गृहमंत्री अमित शाह यांच्या उपस्थितीमध्ये हा पक्षप्रवेश होईल असे म्हटले जात होते. मात्र हा प्रवेश आजच झाला आहे. त्यामुळे अशोक चव्हाणांना भाजपा राज्यसभेची उमेदवारी देणार का? अशी चर्चा सगळीकडे रंगू लागली आहे. दरम्यान भाजपाकडून अशोक चव्हाण यांना राज्यसभेची उमेदवारी दिली जाण्याची शक्यता आहे. दरम्यान अशोक चव्हाण यांच्या पक्षप्रवेशानंतर लगेच भाजपाकडून राज्यसभेची उमेदवारांची यादी जाहीर करण्यात येणार आहे. अशोक चव्हाण यांच्या रूपाने महायुतीने राज्यसभेसाठी ६ वा उमेदवार उभा केल्यास अशोक चव्हाण गटातील काँग्रेस आमदारांकडून क्रॉस व्होटिंग होण्याची शक्यता देखील वर्तविण्यात येत आहे.
विविध मागण्यांसाठी शेतकरी आक्रमक
पंजाब, हरियाणा आणि उत्तर प्रदेशातील शेतकऱ्यांनी किमान आधारभूत किंमत (एमएसपी) हमी देण्याबाबत कायदा करण्यासह अनेक मागण्यांसाठी दिल्लीकडे कूच केले आहे. दिल्ली पोलिसांनी देखील शेतकऱ्यांना राजधानीत प्रवेश करण्यापासून रोखण्यासाठी पूर्ण तयारी केली आहे. दिल्लीत कलम १४४ लागू करण्यात आले आहे. तर पंजाब हरियाणाच्या शंभू सीमेवर शेतकऱ्यांना रोखण्यासाठी सुरक्षा यंत्रणांनी अश्रुधुराच्या नळकांड्या फोडल्याचे वृत्त हाती येत आहे. तसेच दिल्लीच्या सर्व सीमांवर शेतकऱ्यांना रोखण्यासाठी निमलष्करी दल देखील तैनात करण्यात आले आहे.
