सध्या दिल्लीमध्ये भाजपाचे राष्ट्रीय अधिवेशन सुरू आहे. यावेळी तिथे उपस्थित सर्वांना पंतप्रधान नरेंद्र मोदींनी संबोधित केले. यावेळी त्यांनी काँग्रेसवर जोरदार टीका केली. तसेच काँग्रेसच्या काळात झालेल्या भ्रष्टाचारावर काँग्रेसवर ताशेरे ओढले. आमच्या सरकारने गेल्या १० वर्षांमध्ये ”मोठ्या घोटाळ्यांपासून” मुक्त पद्धतीने राज्यकारभार केला आहे, असे मोदी म्हणाले.
यंदाच्या निवडणुकीपूर्वी विरोधक पण म्हणत आहेत की, एनडीए सरकार अब की बार ४०० पार. पंतप्रधान नरेंद्र मोदी भाजपाच्या दोन दिवसीय आयोजित राष्ट्रीय अधिवेशनात बोलत होते. भाजपाला ३७० पेक्षा जास्त तर एनडीएला ४०० पेक्षा जास्त जागा मिळतील असे विधान त्यांनी केले. काही दिवसांपूर्वी संसदेतील भाषणामध्ये देखील त्यांनी हे विधान केले होते. या अधिवेशनाला देशभरातील महत्वाचे नेते, मुख्यमंत्री, संघटक पदांवरील नेते यांना आमंत्रित करण्यात आले आहे.
दरम्यान, २० फेब्रुवारी रोजी पंतप्रधान नरेंद्र मोदी हे जम्मू काश्मीरच्या दौऱ्यावर जाणार आहेत. यावेळी ते उधमपूर जिल्ह्यातील एका रॅलीला संबोधित करणार आहेत. तसेच पंतप्रधान मोदी ३,१६१ कोटी रुपयांच्या विकासकामांचे उदघाटन जम्मू-काश्मीरमध्ये करणार आहेत. पंतप्रधान नरेंद्र मोदींच्या दौऱ्यानिमित्त सुरक्षेची विशेष खबरदारी घेण्यात येत आहे. सुरक्षा अधिकाऱ्यांनी ड्रोन उडवण्यास, लाईट एअरक्राफ्टवर बंदी घातली आहे. सुरक्षा अधिकाऱ्यांनी कलम १४४ अंतर्गत हे आदेश जारी केले आहेत. पंतप्रधान नरेंद मोदींच्या दौऱ्यावेळी कोणताही अनुचित प्रकार घडू नये यासाठी सुरक्षा दले योग्य ती खबरदारी घेताना दिसून येत आहेत.
दहशतवादी व देशविरोधी कारवाया रोखण्यासाठी व दौऱ्यावेळी कोणताही अनुचित प्रकार घडू नये यासाठी ही खबरदारी घेण्यात येत असल्याचे अधिकाऱ्यांनी सांगितले. या दौऱ्यावेळी हवाई निगराणी देखील केली जाणार आहे. संरक्षण व निमलष्करी दलांना या निर्बंधातून सूट देण्यात आली आहे. आदेशाचे उल्लंघन करणाऱ्यांवर कडक कारवाई केली जाणार असल्याचे अधिकाऱ्यांनी सांगितले आहे.
