संसदेत पैसे घेऊन प्रश्न विचारल्या प्रकरणी कारवाई झालेल्या टीएमसीच्या खासदार महुआ मोईत्रा यांच्या काही ठिकाणांवर सीबीआयने छापेमारी केली आहे. सीबीआयने मोईत्रा यांच्या कोलकत्ता आणि इतर ठिकाणी छापेमारी केली आहे. गेल्या वर्षी म्हणजे डिसेंबर 2023 मध्ये, सभापतींनी महुआ मोइत्रा यांच्यावर अनैतिक वर्तनासाठी कारवाई केली होती. त्यांची सभागृहातून हकालपट्टी करण्यात आली होती. त्यानंतर त्यांनी या आदेशाला सर्वोच्च न्यायालयात आव्हान दिले. तर टीएमसीने मोईत्रा यांना लोकसभा निवडणुकीसाठी पश्चिम बंगालमधील कृष्णनगर मतदारसंघातून टीएमसीचे उमेदवार केले आहे.
दरम्यान दोन दिवसांपूर्वी कॅश फॉर क्वेरी (Cash For Query) प्रकरणात टीएमसीच्या माजी खासदार महुआ मोईत्रा (Mahuaa Moitra) यांच्यावर मोठी कारवाई करण्यात आली आहे. या प्रकरणी कारवाई करत सीबीआयने (CBI) गुरुवारी (21 मार्च) मोईत्रा यांच्या विरोधात एफआयआर (FIR) नोंदवला आहे. सीबीआयने चौकशीसाठी रोख रकमेप्रकरणी महुआ मोईत्राविरुद्ध एफआयआर नोंदवून तपास सुरू केला आहे. लोकपालच्या निर्देशानुसार केंद्रीय एजन्सीने ही कारवाई केली आहे. भाजप खासदार निशिकांत दुबे यांनी मोईत्रा यांच्यावर गंभीर आरोप केले होते.
या प्रकरणातील सीबीआयने प्राथमिक तपास केल्यानंतर लोकपालने एजन्सीला सूचना दिल्या. त्याअंतर्गत मोईत्राविरुद्धच्या तक्रारींची सर्व बाजू तपासल्यानंतर सहा महिन्यांत निष्कर्ष सादर करण्याच्या सूचना देण्यात आल्या आहेत. पैसे घेऊन संसदेत प्रश्न विचारल्याच्या प्रकरणात तृणमूल काँग्रेसच्या खासदार महुआ मोईत्रा यांचे लोकसभेतील सदस्यत्व रद्द करण्यात आले आहे. पैसे घेऊन लोकसभेत प्रश्न विचारण्याच्या प्रकरणात संसदेच्या एथिक्स कमिटीकडून मोईत्रा यांची खासदारकी रद्द करण्याची शिफारस करण्यात आली होती. त्यानंतर त्यांच्यावर ही कारवाई करण्यात आली आहे.
