आगामी लोकसभा निवडणुकीत मथुरा येथून पुन्हा भाजपच्या तिकिटावर, निवडणूक लढवत असलेल्या अभिनेत्री हेमा मालिनी यांनी आज वृंदावनमध्ये पक्ष कार्यकर्त्यांसह होळीचा उत्सव साजरा केला. वृंदावनमध्ये त्यांनी पक्षाचे कार्यकर्ते आणि नागरिकांबरोबर होळी खेळली.त्यांना होळीच्या शुभेच्छा दिल्या. यावेळी एएनआय या वृत्तसंस्थेशी बोलताना त्यांनी विरोधकांचाही समाचार घेतला. भाजपचा विकास जनता पाहत असल्याचे सांगितले. यावेळी आम्ही 400 हून अधिक जागा जिंकूच. पण आमच्यावर टीका करण्याऐवजी विरोधकांनीही आमच्या चांगल्या कामाची आणि देशाला पुढे नेण्यासाठी केलेल्या प्रयत्नांची कबुली द्यावी आणि आमच्याबरोबर राष्ट्रनिर्माणात सहभागी व्हावे असा सल्ला त्यांनी यावेळी विरोधकांना दिला आहे.
हिंदी चित्रपटसृष्टीतल्या प्रसिद्ध अभिनेत्री असलेल्या हेमा मालिनी सध्या मथुरेच्या खासदार आहेत. भाजप पक्षाने त्यांच्यावर पुन्हा एकदा विश्वास ठेवत मथुरेतून लोकसभेसाठी लढण्याची संधी दिली आहे. पंतप्रधानांच्या नेतृत्वाखाली भाजपने मोठ्या प्रमाणात विकासकामे केली आहेत. पंतप्रधान मोदींकडे दूरदृष्टी आहे. आपल्या सर्वांना अभिमान आहे की आज भारताने पूर्वीपेक्षा खूप प्रगती केली आहे.असे त्या ह्यावेळी म्हणाल्या आहेत. तसेच आम्ही केवळ 400 जागांपर्यंतच पोहोचू नये, तर त्या आकड्याच्याही पुढे जाऊ यासाठी आम्ही सर्वतोपरी प्रयत्न करू.असा विश्वास हेमामालिनी यांनी या वेळी व्यक्त केला आहे
